رسالة لصديقي المخزن !
كنت ديما عندي ثقة كبيرة فيك و فالذكاء ديالك ! و هاد الهضرة ماشي لحيس الكابة ! لابصح ! كانآمن بيك ذكي ! ماكاتفلت ليك تاحاجة ! و متأكدة أنك ذكي و واعر و عايق و فايق و ماكادارش بيك بسهولة و داكشي علاش عشتي و تعايشتي و كبرتي و طورتي و قدرتي دير يدين و عينين بارتو ! حتى فينا حنايا ! أنا شخصيا كانحس براسي كانتتامي ليك ! فحال بزاف ديال المغاربة شي مرات كانلقا راسي كاندير خدمتك وكانفكر فحالك! شي مرات كايولي لساني هوا لسانك و يدي هوما يديك، و نقدر نخاف منك و نخاف عليك فنفس الوقت حيت كانشوفك نتا لي فاهمنا مزيااان و شي مرات اكثر منا !
ولكن خليك ذكي آ الساط
خليك زوين
خليك كلاس
راه حشومة مامون الدريبي يدافع عليك بديك الطريقة المهينة! حشومة الدريبي يشد الميكرو و يبدا يعاير فالناس و يتهجم عليهم بلسانك، واش نتا باغي تعطي صورة ديال المشاريع الكبرى و طنجة المتوسط و التيجيفي و لاكواريوم و موروكومول و المشاريع لي مديورة باش نعيشو بيخير و على خير مفيكين ضاحكين لاعبين ناشطين و يجي مامون الدريبي يبكي علينا فالراديو ” أنا ساكن فديور الكرا و عندي طوموبيل اوكازيو ومكرفص و حاااامد الله” فحالا الطموح ! و النجاح و الفلوس شي حاجة خايبة ماخصش الشعب يطمح ليها ! كون كنت أنا هوا المخزن مانرضاش يوقفو معايا فحال مامون الدريبي و منار السليمي و الفيزازي و عادل الميلودي و الصنهاجي ! مانرضاش! حشومة آ صاحبي يكرفصو ليك ليماج ديالك بديك الطريقة ! ديك ليماج لي كاتحاول تقاد فيها و تصاوب قدام المنتظم الدولي ! راه إهانة كبيرة للمخزن يدافع عليه مامون الدريبي بواحد الهضرة لي مابقاتش دايزة هاد الوقت و يتهدد على الزفزافي فحالا حنا عايشين فالأدغال ماشي فدولة كايحكمها قانون ” كون ماحشمت نجمع ولاد عمي و نطلع نگطعك تما ” ! حشومة يدافع عليك مامون الدريبي و يبدا يبكي على الناس آه حقا القناعة ! آه حقا أنا عايش بالكريدي ! شغلك هاداك آ خويا لا كنتي ساكن فدار الكرا و عندك طوموبيل اوكازيو و الخلصة ديالك ماقاداكش ! سوقك هاداك و لكن حدك تما و ماشي من حقك تفرض علينا نمط العيش ديالك ! ماتفرضش على لي خرج يطالب بحقوقو الاجتماعية نظرتك القهرة و الزلط باسم ” القناعة” و المصطلحات الفضفاضة !
و ينقز السليمي و يقول بلي الزفزافي شيعي
و ينقز موراه الميلودي يقول بلي الزفزافي باغي يفرق المغاربة و بلي ماشي معقول تولي فيزا بين الريف و المغرب ؟
واش جاب الشيعة و الفيزا و كلشي ديال الله للهضرة وااا سي المخزن؟!
و مال هادو كاملين ركزو على الزفزافي و ماهضروش على المطالب الاجتماعية ؟
واش هادو جاو يدافعو عليك و لا يغرقو ليك الشقف آ خويا!؟
كون كنت انا المخزن نحشم يدافع عليا الفيزازي و يقول للناس ” إن الفتنة نائمة لعن الله من أيقظها” ! واش هاد الهضرة ديال الفتنة نائمة مازال كاتقال ف2017 و يتيقو بيها الناس؟
راه اكبر فتنة هي فتنة الخبز ! الناس بغات الخبز! بغات الكرامة! بغات دير لاباس! تعيش مزيان ! بغات شويكيك ديال الحقوق غي باش تحس براسها عايشة كبنادم و لي يقدر يخلق الفتنة د بصح ماشي هوما الناس لي خارجين للزنقة ! الأسباب لي خلات الناس تخرج هي لي غاتنوض الفتنة ماشي الوقفات و الاحتجاجات!! و فاش كايجيو فحال منار السليمي و الفيزازي و مامون الدريبي و الصنهاجي و عادل الميلودي يدافعو على المخزن بديك الهضرة عاد كايجعرو بنادم و عاد كايقودوها عليك اكثر و اكثر و هضرتهم راها اكبر فتنة
! هادشي كايطرا فأعتى الديموقراطيات كايخرجو الناس يحتجوا و يغوتو على حقهم ! و دوك أعتى الديموقراطيات و لاو ديموقراطيات بالحراكات و الوقفات و الاحتجاجات و بفضل ناس خرجات و دافعات على حقها ! هادشي معروف و كاين فالتاريخ !
و ماكانظنش نتا آ سي المخزن بالذكاء ديالك غادي ديرونجيك هاد المسألة راه اللهم تحكم ناس ذكية و واعية تتجابد نتا و ياها و تتهاز نتا و ياها و فالأخير تجلسو فوق الطبلة و تفاهمو باش تزيدو بالبلاد القدام ! و لا تحكم حوالا مازال كايتيقو بديك الهضرة ديال ” الفتنة نائمة” و ” القناعة كنز لا يفنى ” و تبقى نتا و ياهم اللور اللور تايغرقو ليك الشقف!
وفالأخير ! هادو كاملين لي دواو بسميتك ! و بغاو يبانو مخزنيين اكثر منك ! كاينطابق عليهم المثل القائل ” كون غااا خريتو و مادويتوش”